उन्हाळ्यात दोन आवर्तने देण्याची मागणी; कालवा सल्लागार समितीच्या बैठकीत पाणीवाटप, कालव्यांची कामे आणि पाणीपट्टी माफीचे मुद्दे उपस्थित
कोपरगाव | प्रतिनिधी | राजेंद्र सालकर
कोपरगाव तालुक्यात पावसाची कमतरता आणि खरीप हंगामातील नुकसानीच्या पार्श्वभूमीवर आगामी रब्बी व उन्हाळी हंगामासाठी पाण्याचे नियोजन करण्याची मागणी आमदार आशुतोष काळे यांनी केली आहे. फळबागा, ऊस आणि चारा पिके वाचविण्यासाठी आवर्तने पूर्ण क्षमतेने द्यावीत, तसेच उन्हाळ्यात दोन आवर्तने मिळावीत, अशी मागणी त्यांनी जलसंपदामंत्री राधाकृष्ण विखे पाटील यांच्याकडे केली. दरम्यान, ‘तालुक्यातील कोणत्याही बंधाऱ्याचे पाणी आम्ही देणार नाही. उपलब्ध पाणी सोडणे व्यवहार्य नाही,’ अशी भूमिकाही काळे यांनी मांडली.
अहिल्यानगर जिल्ह्यातील राहाता येथे शनिवारी (दि. २४ ऑक्टोबर) जलसंपदामंत्री राधाकृष्ण विखे पाटील यांच्या अध्यक्षतेखाली कालवा सल्लागार समितीची बैठक झाली. या बैठकीत काळे यांनी कोपरगाव तालुक्यातील पावसाची तूट, शेतीचे नुकसान आणि आगामी हंगामातील पाण्याच्या गरजांकडे लक्ष वेधले.
धरणे भरली; मात्र आवर्तनांचे नियोजन महत्त्वाचे
धरणक्षेत्रात समाधानकारक पाऊस झाल्याने सर्व धरणे पूर्ण क्षमतेने भरली आहेत. मात्र, कोपरगाव मतदारसंघात पाऊस कमी झाल्याने खरीप हंगामात शेतकऱ्यांचे मोठे नुकसान झाले आहे. यापूर्वी धरणे पूर्ण भरलेली असताना रब्बी हंगामात दोन आणि उन्हाळ्यात दोन आवर्तने देण्यात आली होती. यंदाची परिस्थिती लक्षात घेऊन आवर्तने पूर्ण क्षमतेने द्यावीत, अशी मागणी काळे यांनी केली. पुरेसे पाणी मिळाल्यास फळबागा, ऊस आणि चारा पिके वाचविण्यास मदत होईल, असे त्यांनी सांगितले.
‘तालुक्यातील कोणत्याही बंधाऱ्याचे पाणी देणार नाही’
बंधाऱ्यांतील पाणीसाठ्याबाबत काळे यांनी स्पष्ट भूमिका मांडली. आगामी काळात दुष्काळी परिस्थिती निर्माण होण्याची शक्यता लक्षात घेऊन वेळीच पाणी अडविण्यास सुरुवात केली. त्यामुळे केटीवेअरमध्ये थोडेफार पाणी दिसत असले, तरी ते पुरेसे नाही. उपलब्ध पाणीसाठा सोडणे व्यवहार्य नसल्याचे सांगत, तालुक्यातील कोणत्याही बंधाऱ्याचे पाणी देणार नसल्याचे त्यांनी स्पष्ट केले.
‘आम्ही कुणाचेही पाणी घेतलेले नाही. खालचे बंधारे का भरले नाहीत, याची विचारणा पाटबंधारे विभागाच्या अधिकाऱ्यांना करावी,’ अशी भूमिका त्यांनी बैठकीत मांडली.
कालव्यांच्या कामांसाठी निधीची मागणी
गोदावरी उजव्या कालव्याचे आवर्तन सोडण्यापूर्वी चाऱ्यांची कामे पूर्ण करावीत, अशी मागणी काळे यांनी केली. उजव्या कालव्याच्या टेल भागातील कामे पूर्ण झाली असली, तरी वरच्या भागातील चाऱ्यांसाठी निधी उपलब्ध करून द्यावा. डाव्या कालव्यासह चाऱ्यांच्या नूतनीकरणासाठी निधी द्यावा, अशी मागणीही त्यांनी केली.
गोदावरी उजव्या आणि डाव्या कालव्यांवरील निधी उपलब्ध झालेली काही पुलांची कामे जवळपास वर्षभरापासून रखडली असल्याचा मुद्दा त्यांनी उपस्थित केला. ही कामे लवकर सुरू करावीत आणि प्रस्तावित कामांना आवश्यक मंजुरी द्यावी, असे त्यांनी सांगितले.
शेतकऱ्यांची पाणीपट्टी माफ करण्याची मागणी
शेतकऱ्यांची कर्जमाफी आणि साडेसात अश्वशक्तीपर्यंतच्या कृषिपंपांचे वीजबिल माफ करण्याच्या निर्णयांचा उल्लेख करत काळे यांनी शेतकऱ्यांची पाणीपट्टी पूर्णपणे माफ करावी, तसेच खरीप आवर्तनाची पाणीपट्टीही माफ करावी, अशी मागणी केली. कोपरगाव नगरपालिकेची थकीत पाणीपट्टी माफ करण्याची मागणीही त्यांनी केली.
यावर जलसंपदामंत्री राधाकृष्ण विखे पाटील यांनी चालू वर्षाची पाणीपट्टी भरावी, तर थकीत पाणीपट्टीबाबत नंतर निर्णय घेण्यात येईल, असे सांगितले.
आगामी रब्बी आणि उन्हाळी हंगामातील आवर्तनांचे नियोजन, बंधाऱ्यांतील पाणीसाठा आणि कालव्यांच्या रखडलेल्या कामांबाबत पुढील निर्णय महत्त्वाचे ठरणार आहेत.
या बैठकीस आमदार हेमंत ओगले, माजी आमदार स्नेहलता कोल्हे, श्रीरामपूरचे नगराध्यक्ष करण ससाणे, गोदावरी दूध संघाचे अध्यक्ष राजेश परजणे, नाशिक लाभक्षेत्र विकास प्राधिकरणाचे अधीक्षक अभियंता राजेश गोवर्धने, उपजिल्हाधिकारी शैलेश हिंगे, प्रांताधिकारी माणिकराव आहेर, अभियंते संदीप पाटील व विवेक लव्हाट, शिर्डीच्या नगराध्यक्षा जयश्री थोरात, उपनगराध्यक्ष अभय शेळके, बाबासाहेब कोते, राजेंद्र खिल्लारी यांच्यासह अधिकारी व शेतकरी उपस्थित होते.
— पत्रकार राजेंद्र सालकर
👍 बातमी आवडली? शेअर करा | 💬 प्रतिक्रिया कमेंटमध्ये नोंदवा | 📲 ताज्या अपडेटसाठी ‘वृत्तवेध’सोबत जोडलेले रहा.
