कोपरगाव वृत्तवेध ऑनलाईन : राजेंद्र सालकर
दिवाळीच्या सणापूर्वी गौतम सहकारी बँकेने सभासदांना लाभांशाची भेट दिली आहे. आर्थिक वर्ष २०२५-२६ मध्ये बँकेने मिळविलेल्या नफ्यातून ३८ लाख ७९ हजार ३६३ रुपयांचा लाभांश मंगळवारी (३ नोव्हेंबर) सभासदांच्या बँक खात्यांत थेट जमा करण्यात आला. त्यामुळे दिवाळीच्या पार्श्वभूमीवर सभासदांमध्ये समाधानाचे वातावरण असल्याची माहिती आमदार आशुतोष काळे यांनी दिली.
कोपरगाव परिसरातील शेतकरी, कष्टकरी आणि शेतमजुरांच्या आर्थिक उन्नतीसाठी स्वर्गीय कर्मवीर शंकरराव काळे यांनी सहकाराच्या माध्यमातून विविध संस्था उभारल्या. याच सहकाराच्या विचारधारेतून स्थापन झालेल्या गौतम सहकारी बँकेने आर्थिक शिस्त, पारदर्शक कारभार आणि सभासदांच्या हिताला प्राधान्य देत प्रगतीची परंपरा कायम राखली आहे.
माजी आमदार अशोकराव काळे यांच्या मार्गदर्शनाखाली कर्मवीर शंकरराव काळे सहकारी साखर कारखाना व उद्योग समूहातील संलग्न सहकारी संस्था कार्यरत आहेत. बदलत्या काळानुसार गौतम बँकेने आधुनिक बँकिंग प्रणाली स्वीकारली असून ग्राहकांना राष्ट्रीयीकृत बँकांच्या धर्तीवर सेवा देण्यावर भर दिला आहे.
बँकेने योग्य कर्जवाटप, कर्जवसुली आणि प्रशासकीय शिस्त यांना प्राधान्य दिल्यामुळे आर्थिक प्रगती साधणे आणि सभासदांना लाभांश देणे शक्य होत असल्याचे आमदार काळे यांनी सांगितले.
बँकेचे अध्यक्ष संजय आगवण, उपाध्यक्ष विजय रक्ताटे, संचालक मंडळ, मुख्य कार्यकारी अधिकारी प्रवीण पावडे, प्रशासकीय अधिकारी बापूसाहेब घेमुड आणि कर्मचारी यांच्या नियोजनबद्ध कामकाजाचे आमदार काळे यांनी कौतुक केले. दिवाळीपूर्वीच लाभांशाची रक्कम थेट खात्यात जमा झाल्याने सभासदांकडून समाधान व्यक्त केले जात आहे.
👍 बातमी आवडली? शेअर करा | 💬 प्रतिक्रिया कमेंटमध्ये नोंदवा | 📲 ताज्या अपडेटसाठी ‘वृत्तवेध’सोबत जोडलेले रहा.
