कोपरगाव वृत्तवेध ऑनलाईन राजेंद्र सालकर.: कर्मवीर शंकरराव काळे यांच्या १४व्या पुण्यस्मरणाचे औचित्य साधून शनिवार (दि. २१) ते सोमवार (दि. २३) या कालावधीत गौतम पब्लिक स्कूलच्या मैदानावर भव्य ‘कर्मवीर कृषी महोत्सवा’चे आयोजन करण्यात आले आहे. आधुनिक शेती तंत्रज्ञान, कृषी क्षेत्रातील नव्या संकल्पना तसेच शेतीपूरक व्यवसायांची माहिती शेतकऱ्यांपर्यंत पोहोचविणे हा या महोत्सवाचा प्रमुख उद्देश आहे. मतदारसंघातील शेतकरी बांधवांनी मोठ्या संख्येने सहभागी होऊन महोत्सवाचा लाभ घ्यावा, असे आवाहन आमदार आशुतोष काळे यांनी केले.
कर्मवीर शंकरराव काळे यांच्या पुण्यस्मरणानिमित्त आयोजित विविध कार्यक्रमांमध्ये त्यांच्या सामाजिक, सहकार आणि कृषी क्षेत्रातील योगदानाचे स्मरण करण्यात आले. त्यांच्या कार्यातून ग्रामीण भागातील शेतकरी आणि सर्वसामान्यांच्या जीवनात सहकाराच्या माध्यमातून बदल घडवून आणण्याचा प्रयत्न झाला. त्याच विचारांना आधुनिक शेती तंत्रज्ञानाची जोड देण्याच्या उद्देशाने कृषी महोत्सवाचे आयोजन करण्यात आले आहे.
आधुनिक शेती तंत्रज्ञानाची माहिती मिळणार
शेतीतील बदलते तंत्रज्ञान, आधुनिक पद्धती, शेतीपूरक उद्योग आणि नव्या कृषी संकल्पनांची माहिती शेतकऱ्यांना एकाच ठिकाणी उपलब्ध व्हावी, यासाठी कृषी महोत्सवाचे नियोजन करण्यात आले आहे. शेतकऱ्यांनी केवळ पारंपरिक शेतीवर अवलंबून न राहता आधुनिक तंत्रज्ञानाचा वापर करून उत्पादन आणि उत्पन्न वाढविण्याच्या दिशेने वाटचाल करावी, हा या उपक्रमामागील उद्देश आहे.
पदाधिकाऱ्यांचे जाहीर आभार
कार्यक्रमाच्या आयोजनासाठी सहकार्य करणाऱ्या विविध संस्था, पदाधिकारी, कार्यकर्ते आणि नागरिकांचे आमदार आशुतोष काळे यांनी जाहीर आभार मानले. कार्यक्रमास विविध संस्थांचे पदाधिकारी, कारखान्याचे संचालक मंडळ, अधिकारी, शिक्षक, प्राचार्य, कार्यकर्ते आणि नागरिक मोठ्या संख्येने उपस्थित होते.
वारकरी परंपरेचा वारसा पुढे
चौकट : कर्मवीर शंकरराव काळे यांनी वारकरी संप्रदायाच्या माध्यमातून आध्यात्मिक आणि सांस्कृतिक मूल्यांची जपणूक केली. वारकरी संप्रदायाशी असलेला त्यांचा जिव्हाळा माजी आमदार अशोकराव काळे यांनीही पुढे जपला. हाच वारसा आमदार आशुतोष काळे पुढे नेत आहेत.
त्यांच्या संकल्पनेतून कर्मवीर शंकरराव काळे मित्र मंडळाच्या वतीने मतदारसंघातील सहा गटांतील भजनी मंडळांना वीणा, पखवाज, हार्मोनियम, दहा टाळ आणि सतरंजी या भजन साहित्याचे लकी ड्रॉ पद्धतीने वाटप करण्यात आले.
यामध्ये शनेश्वर भजनी मंडळ, वडगाव; जय हनुमान भजनी मंडळ, मढी बु.; गोपाजीबाबा भजनी मंडळ, बहादराबाद; दत्त प्रसाद भजनी मंडळ, धोत्रे; रेणुकामाता भजनी मंडळ, उक्कडगाव आणि हनुमान प्रसादिक भजनी मंडळ, लक्ष्मीनगर कोपरगाव यांचा समावेश आहे.
मान्यवरांची उपस्थिती
कार्यक्रमास माजी आमदार अशोकराव काळे, आमदार आशुतोष काळे, जिल्हा बँकेच्या माजी संचालिका चैताली काळे, ॲड. प्रमोद जगताप, ह.भ.प. राघ्वेश्वरानंदगिरी महाराज, ह.भ.प. सोमनाथ महाराज मोरे, कर्मवीर शंकरराव काळे मित्र मंडळाचे अध्यक्ष कारभारी आगवण, उपाध्यक्ष नारायण मांजरे, कारखान्याचे उपाध्यक्ष दिनार कुदळे, महानंदाचे माजी उपाध्यक्ष राजेंद्र जाधव यांच्यासह विविध संस्थांचे पदाधिकारी उपस्थित होते.
यावेळी कारखान्याचे संचालक मंडळ, कार्यकारी संचालक सोमनाथ बोरनारे, जनरल मॅनेजर सुनील कोल्हे, आसवनी विभागाचे जनरल मॅनेजर ज्ञानेश्वर आभाळे, सेक्रेटरी बाबा सय्यद, असिस्टंट सेक्रेटरी संदीप शिरसाठ, कार्यकर्ते, शिक्षक, प्राचार्य आणि नागरिक मोठ्या संख्येने उपस्थित होते.
कोपरगाव वृत्तवेध ऑनलाईन : राजेंद्र सालकर
ही बातमी उपयुक्त वाटली असेल तर आपल्या मित्रांपर्यंत नक्की शेअर करा. आपल्या प्रतिक्रिया कमेंटमध्ये जरूर नोंदवा. अशाच ताज्या आणि विश्वासार्ह बातम्यांसाठी ‘वृत्तवेध’ला नियमित भेट द्या.
