आशुतोष काळे यांच्या संकल्पनेला सुनेत्रा पवार यांच्या हस्ते मूर्त रूप; नेतृत्व, संघर्ष आणि विकासकार्याचा वेध
मुंबई | वृत्तवेध ऑनलाईन
दिवंगत उपमुख्यमंत्री अजित पवार यांच्या नेतृत्वाचा, संघर्षमय राजकीय प्रवासाचा आणि महाराष्ट्राच्या विकासातील योगदानाचा वेध घेणाऱ्या ‘आठवणीतले दादा’ या विशेष स्मरणपुस्तिकेचे प्रकाशन बुधवारी (दि. १४) मुंबईतील सह्याद्री अतिथीगृह येथे उपमुख्यमंत्री सुनेत्रा पवार यांच्या हस्ते झाले. आमदार आशुतोष काळे यांच्या संकल्पनेतून साकारलेल्या या पुस्तकातून अजित पवार यांच्या कार्यकर्तृत्वाच्या आठवणींना उजाळा देण्यात आला आहे.
नेतृत्व, विकासकार्य आणि जिव्हाळ्याच्या नात्यांचा वेध
अजित पवार यांच्या सहवासातील आठवणी, प्रशासकीय कारकिर्दीतील महत्त्वपूर्ण निर्णय, महाराष्ट्राच्या विकासासाठी त्यांनी केलेले कार्य आणि सर्वसामान्य जनतेशी असलेले नाते यांचे प्रतिबिंब या स्मरणपुस्तिकेत उमटले आहे. राजकीय क्षेत्रातील मान्यवरांनी आपल्या अनुभवांतून त्यांच्या व्यक्तिमत्त्वाचे विविध पैलू मांडले आहेत. त्यांचे कणखर नेतृत्व, निर्णयक्षमता, विकासकामांबाबतची तळमळ आणि कार्यकर्त्यांशी असलेला जिव्हाळा नव्या पिढीपर्यंत पोहोचविण्याचा प्रयत्न या पुस्तकातून करण्यात आला आहे.
या स्मरणपुस्तिकेची संकल्पना आमदार आशुतोष काळे यांची असून, देवळाली प्रवरा येथील गणेश आंबीलवादे यांनी संपादनाची जबाबदारी पार पाडली आहे.
‘आठवणी जतन होणे भावनिक बाब’
प्रकाशनप्रसंगी सुनेत्रा पवार यांनी अजित पवार यांच्या जीवनप्रवासाला आणि महाराष्ट्रासाठीच्या योगदानाला उजाळा दिला. त्यांच्या सहवासातील आठवणी, प्रशासकीय कारकीर्द आणि कार्याचा प्रवास या पुस्तकाच्या माध्यमातून पुन्हा एकदा समोर आला आहे. त्यांच्या आठवणी अशा स्वरूपात जतन होणे ही आपल्यासाठी भावनिक आणि जिव्हाळ्याची बाब असल्याची भावना त्यांनी व्यक्त केली.
‘दादा माझ्या राजकीय वाटचालीतील आधारस्तंभ’
आमदार आशुतोष काळे यांनी अजित पवार यांच्याशी असलेल्या ऋणानुबंधांना उजाळा दिला. अजितदादांच्या खंबीर नेतृत्वाखाली काम करताना कोपरगाव मतदारसंघाच्या विकासाला गती देण्याची संधी मिळाली. त्यांचा आपल्यावरील विश्वास आणि पाठबळ यामुळे राजकीय वाटचालीत आत्मविश्वास मिळाला आणि जनतेच्या प्रश्नांसाठी प्रभावीपणे काम करण्याची प्रेरणा मिळाली, असे काळे यांनी सांगितले.
अजित पवार यांच्या निधनाने आपल्या राजकीय जीवनातील भक्कम आधारस्तंभ हरपला आहे. त्यांचे नेतृत्व, विकासाची दूरदृष्टी, निर्णयक्षमता आणि कार्यकर्त्यांवरील प्रेम कायम स्मरणात राहील. त्यांच्या आठवणी आणि कार्याचा वारसा जतन करण्याच्या भावनेतूनच ‘आठवणीतले दादा’ या स्मरणपुस्तिकेची संकल्पना पुढे आली, असेही त्यांनी स्पष्ट केले.
या प्रकाशन सोहळ्यास कृषिमंत्री दत्तात्रय भरणे, अन्न व नागरी पुरवठामंत्री छगन भुजबळ, वैद्यकीय शिक्षणमंत्री हसन मुश्रीफ, महिला व बालविकासमंत्री आदिती तटकरे, मंत्री नरहरी झिरवाळ, आमदार दिलीप बनकर, श्रीकांत जाधव, सागर भालेराव, महेश गिरमे, संपादक गणेश आंबीलवादे यांच्यासह पक्षातील ज्येष्ठ नेते, मान्यवर आणि पदाधिकारी उपस्थित होते.
वृत्तवेध | सत्य दे असरदार
‘आठवणीतले दादा’ ही स्मरणपुस्तिका म्हणजे अजित पवार यांच्या राजकीय प्रवासातील आठवणी, विकासकार्य आणि कार्यकर्त्यांशी असलेल्या नात्यांचे दस्तऐवजीकरण करण्याचा प्रयत्न आहे.
Tags: आठवणीतले दादा, अजित पवार, आशुतोष काळे, सुनेत्रा पवार, स्मरणपुस्तिका प्रकाशन, महाराष्ट्र राजकारण, वृत्तवेध ऑनलाईन
