कोपरगावासह तालुक्यातील चोरट्यांवर वचक निर्माण करण्यासाठी पोलिसांना स्पष्ट निर्देश
कोपरगाव वृत्तवेध ऑनलाईन
कोपरगाव शहर आणि तालुक्यात वाढत्या चोरीच्या घटनांच्या पार्श्वभूमीवर आमदार आशुतोष काळे यांनी पोलिसांना अधिक सतर्क राहण्याच्या सूचना दिल्या आहेत. बाहेरून आलेला पाहुणा असो किंवा स्थानिक नागरिक, प्रत्येकाला कोपरगाव शहर आणि तालुक्यात सुरक्षिततेची खात्री वाटली पाहिजे. चोरांच्या मनात पोलिसांचा धाक आणि नागरिकांच्या मनात कायदा-सुव्यवस्थेबद्दल विश्वास निर्माण झाला पाहिजे, असे त्यांनी स्पष्ट केले.
शनिवारी दुपारी दोन वाजता कोपरगाव शहर पोलीस ठाण्याच्या सभागृहात शहर व तालुका पोलिसांची आढावा बैठक झाली. शहर पोलीस निरीक्षक उद्धव डमाळे, तालुका पोलीस निरीक्षक संभाजी गायकवाड आणि पोलीस उपनिरीक्षक संदीप सोन्ने यांच्या उपस्थितीत झालेल्या या बैठकीत वाढत्या चोऱ्या, पोलीस गस्त, बसस्थानकावरील सुरक्षा आणि ग्रामीण भागातील चोरीच्या घटनांवर चर्चा करण्यात आली.
गर्दीच्या ठिकाणी पोलिसांची करडी नजर हवी
गेल्या चार ते सहा महिन्यांत शहर आणि ग्रामीण भागात चोरीच्या घटना वाढल्याच्या तक्रारी बैठकीत मांडण्यात आल्या. पोलिसांचे काम चांगले असले तरी नागरिकांना अधिक सुरक्षित वाटण्यासाठी आणखी प्रभावी काम करण्याची गरज असल्याचे आमदार काळे यांनी सांगितले.
बसस्थानक, गर्दीची ठिकाणे आणि सण-उत्सवांच्या काळात पोलिसांनी विशेष दक्षता घ्यावी. बसस्थानकावर केवळ होमगार्ड तैनात करून चालणार नाही, तर सक्षम पोलीस बंदोबस्तही आवश्यक आहे. महिलांच्या दागिन्यांच्या चोरीच्या घटना रोखण्यासाठी कायमस्वरूपी आणि चोख बंदोबस्त ठेवावा, अशी सूचना त्यांनी केली.
सीसीटीव्ही कॅमेरे आणि मोबाईल तंत्रज्ञानाचा प्रभावी वापर करून चोरट्यांचा शोध घ्यावा. चोरी झाल्यानंतर तपास करण्याबरोबरच चोरी होऊ नये, यासाठी प्रतिबंधात्मक उपाययोजना कराव्यात, असेही त्यांनी स्पष्ट केले.
बंद फ्लॅट, शेतातील मोटारी आणि सौरपॅनेल चोरट्यांच्या निशाण्यावर
बैठकीत शिवाजी ठाकरे यांनी वाढत्या भुरट्या चोऱ्यांचा प्रश्न उपस्थित केला. बंद फ्लॅट फोडणे, शेतातील पाण्याच्या मोटारी आणि केबल चोरणे, तसेच सौरऊर्जा पॅनेल चोरीला जाण्याचे प्रकार घडत असल्याचे त्यांनी निदर्शनास आणले.
ग्रामीण भागात चोरीच्या घटना रोखण्यासाठी ग्रामसुरक्षा दल मजबूत करणे, होमगार्डची संख्या वाढविण्यासाठी पाठपुरावा करणे, पोलिसांची गस्त वाढविणे आणि नागरिकांमध्ये जनजागृती करणे आवश्यक असल्याचे त्यांनी सांगितले. दुष्काळी परिस्थितीच्या पार्श्वभूमीवर संभाव्य धोके लक्षात घेऊन पोलिसांनी प्रतिबंधात्मक उपाययोजनांना प्राधान्य द्यावे, अशी मागणीही करण्यात आली.
‘घुंगट की आड में’ चोरी; सीसीटीव्हीसमोर नवे आव्हान
बसस्थानकावरील चोरीच्या घटनांबाबत बोलताना शहर पोलीस निरीक्षक उद्धव डमाळे यांनी अनेक चोरट्यांना पकडण्यात पोलिसांना यश आल्याचे सांगितले. काही महिला चोर डोक्यावर पदर घेऊन चोरी करत असल्याने सीसीटीव्ही फुटेजमधून त्यांची ओळख पटविण्यात अडचणी येतात, असे त्यांनी नमूद केले.
कार्यकर्त्यांनी चुकीचे समर्थन करू नये!
पोलीस ठाण्यात तक्रार किंवा कामासाठी येताना राष्ट्रवादी काँग्रेसच्या पदाधिकारी व कार्यकर्त्यांनी कोणाचीही चुकीची बाजू घेऊ नये, अशी स्पष्ट सूचना आमदार काळे यांनी केली. आपला कार्यकर्ता आहे म्हणून त्याच्या चुकीचे समर्थन करू नका. कोणावर अन्याय होता कामा नये आणि कोणताही गैरप्रकार घडता कामा नये, अशा शब्दांत त्यांनी पक्षाच्या पदाधिकारी व कार्यकर्त्यांना सज्जड सूचना दिल्या.
नागरिकांनी संशयास्पद हालचाली किंवा संभाव्य गुन्ह्याची माहिती तातडीने पोलिसांना द्यावी आणि पोलिसांना सहकार्य करावे, असे आवाहन त्यांनी केले. पोलीस आणि पत्रकार यांच्यात समन्वय राहणेही आवश्यक असल्याचे त्यांनी नमूद केले.
चौकट | सुरक्षित कोपरगावसाठी महत्त्वाच्या सूचना
शहर व ग्रामीण भागात पोलिसांची गस्त वाढविणे,.बसस्थानक आणि गर्दीच्या ठिकाणी प्रभावी बंदोबस्त ठेवणे.,सीसीटीव्ही यंत्रणेचा सक्षमपणे वापर करणे.,ग्रामसुरक्षा दल, होमगार्ड आणि पोलीस यांच्यात समन्वय वाढविणे.,गुन्हे घडल्यानंतर तपासाबरोबरच गुन्हे रोखण्यासाठी प्रतिबंधात्मक उपाय करणे.
या बैठकीस कर्मवीर काळे सहकारी साखर कारखान्याचे उपाध्यक्ष दिनार कुदळे, कोपरगाव तालुका एज्युकेशन सोसायटीचे संचालक संदीप रोहमारे, नगरसेवक मेहमूद सय्यद, मंदार पहाडे, सुनील गंगुले, विरेन बोरावके, राजेंद्र वाकचौरे, प्रशांत वाबळे, फकीर मामू कुरेशी यांच्यासह पदाधिकारी व कार्यकर्ते उपस्थित होते. पोलीस उपनिरीक्षक संदीप सोनवणे यांनी आभार मानले.
ही बातमी उपयुक्त वाटली असेल तर आपल्या मित्रांपर्यंत नक्की शेअर करा. आपल्या प्रतिक्रिया कमेंटमध्ये जरूर नोंदवा. अशाच ताज्या आणि विश्वासार्ह बातम्यांसाठी ‘वृत्तवेध’ला नियमित भेट द्या.
