राज्याचे माजी उपमुख्यमंत्री तथा माजी अर्थमंत्री अजितदादा पवार यांच्या जयंतीनिमित्त कर्मवीर शंकरराव काळे सहकारी साखर कारखाना कार्यस्थळावर त्यांच्या प्रतिमेचे पूजन करून अभिवादन करण्यात आले. यावेळी माजी आमदार अशोकराव काळे यांनी अजितदादा पवार यांच्या विकासाभिमुख नेतृत्वाचा गौरव करत राज्याच्या विकासातील त्यांच्या योगदानाचा विशेष उल्लेख केला.
कोपरगाव वृत्तवेध :तालुक्यातील कर्मवीर शंकरराव काळे सहकारी साखर कारखाना कार्यस्थळावर माजी उपमुख्यमंत्री अजितदादा पवार यांच्या जयंतीनिमित्त आयोजित कार्यक्रमात त्यांच्या प्रतिमेस पुष्पहार अर्पण करून अभिवादन करण्यात आले. माजी आमदार अशोकराव काळे यांच्या हस्ते हा कार्यक्रम पार पडला.
यावेळी बोलताना अशोकराव काळे यांनी अजितदादा पवार यांच्या कार्यशैलीचा गौरव करताना विकासकामांना दिलेले प्राधान्य, प्रशासनावरील मजबूत पकड आणि सर्वसामान्य जनतेप्रती असलेली बांधिलकी यामुळे त्यांनी जनमानसात वेगळे स्थान निर्माण केल्याचे सांगितले.
ते म्हणाले की, आपल्या आमदारकीच्या काळात विरोधी पक्षात असूनही मतदारसंघातील विविध विकासकामांसाठी अजितदादा पवार यांनी उदारपणे निधी उपलब्ध करून दिला. त्यामुळे अनेक महत्त्वपूर्ण प्रकल्पांना गती मिळाली. स्पष्टवक्तेपणा, वक्तशीरपणा, निर्णयक्षम नेतृत्व आणि प्रशासनावरील प्रभावी नियंत्रण ही त्यांच्या नेतृत्वाची वैशिष्ट्ये असल्याचे त्यांनी नमूद केले.
राज्याच्या अर्थकारणात महत्त्वपूर्ण भूमिका बजावताना अजितदादा पवार यांनी विविध जबाबदाऱ्या यशस्वीपणे सांभाळल्या. विकासकेंद्री दृष्टीकोन आणि कार्यक्षम नेतृत्वामुळे ते राज्यातील सर्व स्तरांतील नागरिकांमध्ये लोकप्रिय राहिले, असेही काळे यांनी सांगितले.
जयंतीनिमित्त कारखाना परिसरात संचालकांच्या हस्ते वृक्षारोपण करून पर्यावरण संवर्धनाचा संदेश देण्यात आला.
कार्यक्रमास कारखान्याचे व्हा. चेअरमन प्रवीण शिंदे, संचालक राजेंद्र घुमरे, सूर्यभान कोळपे, दिलीपराव बोरनारे, श्रीराम राजेभोसले, सचिन चांदगुडे, शंकरराव चव्हाण, सुनील मांजरे, मनोज जगझाप, प्रशांत घुले, डॉ. मच्छिंद्र बर्डे, अशोकराव मवाळ, विष्णू शिंदे, श्रावण आसने, कार्यकारी संचालक सोमनाथ बोरनारे, जनरल मॅनेजर सुनील कोल्हे, आसवनी विभागाचे जनरल मॅनेजर ज्ञानेश्वर आभाळे, सेक्रेटरी बाबासाहेब सय्यद, डेप्युटी सेक्रेटरी संदीप शिरसाठ तसेच विविध विभागांचे अधिकारी आणि कर्मचारी उपस्थित होते.
👍 बातमी आवडली? शेअर करा | 💬 प्रतिक्रिया कमेंटमध्ये नोंदवा | 📲 ताज्या अपडेटसाठी ‘वृत्तवेध’सोबत जोडलेले रहा.
