शिवसैनिकांचे आक्रमक आंदोलन; पोलिसांनी कारवाई करण्याची गगन हाडा यांची मागणी
कोपरगाव : शिवसेनाप्रमुख बाळासाहेब ठाकरे यांच्या फोटो फाडल्याच्या कथित प्रकाराचे पडसाद कोपरगावात उमटले. या घटनेच्या निषेधार्थ ठाकरे गटाच्या शिवसैनिकांनी शहरातील हिंदुहृदयसम्राट बाळासाहेब ठाकरे कमानीसमोर आंदोलन करत शिंदे गटाच्या विरोधात जोरदार घोषणाबाजी केली. यावेळी शायना एनसी यांच्या फोटोला काळे फासून व जोडे मारत निषेध व्यक्त करण्यात आला.
शहर प्रमुख गगन हाडा यांच्या नेतृत्वाखाली झालेल्या या आंदोलनात शिवसैनिकांनी संबंधित प्रकाराबाबत तीव्र संताप व्यक्त केला. बाळासाहेब ठाकरे यांच्या प्रतिमेची विटंबना केल्याचा आरोप करत पोलिसांनी तातडीने चौकशी करून दोषींवर कायदेशीर कारवाई करावी, अशी मागणी हाडा यांनी केली.
गगन हाडा म्हणाले, “बाळासाहेब ठाकरे हे शिवसैनिकांच्या श्रद्धेचे केंद्र आहेत. त्यांच्या प्रतिमेबाबत जाणीवपूर्वक विटंबना झाल्याचे समोर येत असेल, तर त्याची गंभीर दखल घेतली पाहिजे. पोलिसांनी या प्रकरणाची चौकशी करून दोषींवर कारवाई करावी.”
शिवसेना उपजिल्हाप्रमुख अस्लम शेख म्हणाले खासदारकीसाठी मातोश्रीचे उंबरटे झिजवणाऱ्या शायनाबाईंनी डाळ शिजत नसल्याचे पाहून मिंध्यांची शिंदेसेना गाठली, आता तिथे काही मिळावे या हेतूने त्यांची चमकेगिरी चालू असल्याचा आरोप केला. “बाळासाहेबांचा फोटो फाडण्याच्या प्रकाराचा कोपरगाव शिवसेनेच्या वतीने जाहीर निषेध करतो,” असे त्यांनी सांगितले.
तालुका प्रमुख श्रीरंग चांदगुडे यांनी शिंदे गटावर निशाणा साधला. “बाळासाहेबांचे नाव आणि प्रतिमा वापरून राजकारण करणाऱ्यांनी त्याच बाळासाहेबांचा फोटो फाडण्याची वेळ का यावी, याचे उत्तर त्यांनी द्यावे,” असा सवाल त्यांनी केला.
या आंदोलनात शहर प्रमुख गगन हाडा, तालुका प्रमुख श्रीरंग चांदगुडे, उपजिल्हाप्रमुख अस्लम शेख, संजय दंडवते, संपर्कप्रमुख मनोज कपोते, विधानसभा प्रमुख विवेक कुलकर्णी, युवासेना तालुका प्रमुख विजय गोर्डे, बाळासाहेब मापारी, सुनील माकोने, विठ्ठल निकम, काना हाडा, नंदू निकम, निखिल क्रँकाले, नानासाहेब निकम, हृषिकेश खैरनार, वरुण टाक, कुणाल चावरे, विनय टाक, मुन्ना मन्सुरी यांच्यासह शिवसैनिक उपस्थित होते.
ही बातमी उपयुक्त वाटली असेल तर आपल्या मित्रांपर्यंत नक्की शेअर करा. आपल्या प्रतिक्रिया कमेंटमध्ये जरूर नोंदवा. अशाच ताज्या आणि विश्वासार्ह बातम्यांसाठी ‘वृत्तवेध’ला नियमित भेट द्या.
