आ. विवेक कोल्हे यांचा महावितरणकडे पाठपुरावा; ४० एकरांवर उभारलेला प्रकल्प लवकरच कार्यान्वित होण्याची अपेक्षा
कोपरगाव वृत्तवेध ऑनलाईन : राजेंद्र सालकर
कोपरगाव तालुक्यातील कासली येथे ४० एकर क्षेत्रावर उभारण्यात आलेला १३ मेगावॅट क्षमतेचा सौर ऊर्जा प्रकल्प अंतिम टप्प्यात आला आहे. फिडरसंदर्भातील अडचणी दूर करून प्रकल्प लवकर सुरू करण्यासाठी आ. विवेक कोल्हे यांनी महावितरण विभागाकडे पत्रव्यवहार करून पाठपुरावा केला. या पाठपुराव्यानंतर प्रकल्पाच्या कामाला गती मिळाली असून, लवकरच लोकार्पण होण्याची अपेक्षा आहे.
या प्रकल्पातून ११ केव्ही वीजवाहिनीद्वारे ३३/११ केव्ही दहेगाव बोलका उपकेंद्राला सौर वीज उपलब्ध होणार आहे. दहेगाव, कासली, लौकी, गोधेगाव, घोयेगाव, आपेगाव, तिळवणी, शिरसगाव, सवळगाव आणि उक्कडगाव या दहा गावांतील वीजग्राहकांना त्याचा लाभ होणार आहे.
या परिसरात एकूण ४ हजार ३८२ वीजग्राहक असून, त्यात २ हजार २०० कृषीपंपधारक, २ हजार ३० घरगुती, ८९ व्यावसायिक, ३५ औद्योगिक आणि २८ इतर वीजग्राहकांचा समावेश आहे. पाच कृषी फिडरद्वारे शेतीपंपांना वीजपुरवठा केला जातो. सौर प्रकल्प कार्यान्वित झाल्यानंतर कृषी फिडरवरील वीजपुरवठ्याचे नियोजन सुलभ होण्यास मदत होईल. तसेच शेतकऱ्यांना दिवसा वीज उपलब्ध होण्यास हातभार लागण्याची अपेक्षा आहे.
दरम्यान, उक्कडगाव ए.जी. फिडर क्रमांक ६२ वरील अतिरिक्त विद्युत भार कमी करण्यासाठी १० किलोमीटर लांबीची नवीन ११ केव्ही उच्चदाब वीजवाहिनी उभारण्याचा प्रस्ताव आहे. आरडीएसएस योजनेअंतर्गत नवीन वीजवाहिनी मंजूर करून स्वतंत्र फिडर सेपरेटर बसविण्याबाबतही कार्यवाही सुरू झाली आहे.
सध्या सिंगल फेज आणि थ्री फेज वीजपुरवठ्यावर अतिरिक्त भार पडत असल्याने ओव्हरलोडिंग आणि कमी दाबाने वीजपुरवठ्याची समस्या निर्माण होत आहे. ही समस्या दूर करण्यासाठी आ. विवेक कोल्हे यांच्या सूचनेनंतर कार्यवाही सुरू झाल्याचे सांगण्यात आले. कासलीचा सौर प्रकल्प आणि फिडरवरील भार कमी करण्याची कामे पूर्ण झाल्यानंतर परिसरातील शेतकरी व अन्य वीजग्राहकांना कितपत दिलासा मिळतो, हे प्रत्यक्ष कार्यान्वयनानंतर स्पष्ट होणार आहे.
👍 बातमी आवडली? शेअर करा | 💬 प्रतिक्रिया कमेंटमध्ये नोंदवा | 📲 ताज्या अपडेटसाठी ‘वृत्तवेध’सोबत जोडलेले रहा.
