आ. विवेक कोल्हे यांचा पुढाकार; दहा गणांतील नागरिकांना समस्या मांडण्याची संधी, २९ ऑक्टोबरपर्यंत अर्ज देण्याचे आवाहन
कोपरगाव | राजेंद्र सालकर
कोपरगाव : शासकीय कार्यालयांतील प्रलंबित कामे, नागरिकांच्या तक्रारी आणि गावोगावच्या विकासकामांच्या मागण्यांना गती देण्यासाठी आमदार विवेक कोल्हे यांच्या संकल्पनेतून कोपरगाव तालुक्यात ‘लोकसंवाद’ उपक्रमाचे आयोजन गुरुवार, ५ नोव्हेंबर २०२६ रोजी करण्यात येणार आहे. या उपक्रमात नागरिकांना आपल्या समस्या थेट प्रशासनासमोर मांडता येणार असून, संबंधित विभागांकडून तक्रारींवर झालेल्या कार्यवाहीची माहितीही मिळणार आहे.
आ. विवेक कोल्हे यांनी या उपक्रमाच्या आयोजनाबाबत कोपरगावचे तहसीलदार महेश सावंत यांना पत्राद्वारे सूचना दिल्या आहेत. नागरिकांच्या प्रश्नांचा पाठपुरावा करणे, प्रलंबित प्रकरणांवर कार्यवाहीसाठी प्रयत्न करणे आणि विकासकामांच्या मागण्या संबंधित विभागांपर्यंत पोहोचविणे, हा या उपक्रमाचा उद्देश आहे.
दहा गणांतील नागरिकांना संधी
ब्राह्मणगाव, करंजी, सुरेगाव, धामोरी, चांदेकसारे, कोळपेवाडी, शिंगणापूर, संवत्सर, वारी आणि पोहेगाव या दहा गणांतील नागरिकांना या उपक्रमात सहभागी होता येणार आहे. महसूल, शेती, पाणीपुरवठा, वीज, रस्ते, आरोग्य, शिक्षण आणि इतर विकासकामांशी संबंधित समस्या व मागण्या नागरिकांना मांडता येतील.
२९ ऑक्टोबरपर्यंत गणप्रमुखांकडे अर्ज द्या
लोकसंवादात आपल्या समस्या मांडू इच्छिणाऱ्या नागरिकांनी गुरुवार, २९ ऑक्टोबर २०२६ पूर्वी संबंधित गणप्रमुखांकडे अर्ज सादर करावेत, असे आवाहन करण्यात आले आहे. अर्जामध्ये समस्येचा सविस्तर तपशील नमूद करावा, जेणेकरून संबंधित विभागाकडे पाठपुरावा करता येईल.
विविध विभागांचे अधिकारी राहणार उपस्थित
महसूल, शेती महामंडळ, वन विभाग, जलसंपदा, पंचायत समिती, कृषी, महावितरण, सार्वजनिक बांधकाम, पाणीपुरवठा, आरोग्य, शिक्षण, पोलीस, परिवहन, नगरपालिका, समाजकल्याण, महिला व बालविकास, पशुसंवर्धन आणि सहकार आदी विभागांच्या अधिकाऱ्यांना उपस्थित राहण्याच्या सूचना देण्यात आल्या आहेत.
संबंधित अधिकाऱ्यांनी स्वतः उपस्थित राहून नागरिकांच्या तक्रारींवर झालेल्या कार्यवाहीची माहिती द्यावी, अशी अपेक्षा आ. कोल्हे यांनी व्यक्त केली आहे. त्यामुळे प्रलंबित प्रश्नांची सद्यस्थिती जाणून घेण्याची आणि संबंधित विभागांकडे थेट विचारणा करण्याची संधी नागरिकांना मिळणार आहे.
कार्यक्रमाचे ठिकाण तहसील कार्यालयाच्या वतीने लवकरच जाहीर करण्यात येणार आहे. कोपरगाव तालुक्यातील नागरिकांनी मुदतीत अर्ज सादर करून या लोकसंवाद उपक्रमाचा लाभ घ्यावा, असे आवाहन आ. विवेक कोल्हे यांच्या वतीने करण्यात आले आहे.
वृत्तवेध ऑनलाईन | कोपरगाव बातमी : राजेंद्र सालकर
ही बातमी उपयुक्त वाटली असेल तर आपल्या मित्रांपर्यंत नक्की शेअर करा. आपल्या प्रतिक्रिया कमेंटमध्ये जरूर नोंदवा. अशाच ताज्या आणि विश्वासार्ह बातम्यांसाठी ‘वृत्तवेध’ला नियमित भेट द्या.
