कोपरगाव वृत्तवेध:
समता इंटरनॅशनल स्कूलच्या प्रांगणात झालेल्या ७ व्या जिल्हास्तरीय योगासन स्पोर्ट्स चॅम्पियनशिप स्पर्धेत संगमनेर तालुक्याने दमदार कामगिरी करत विजेतेपद पटकावले. अहिल्यानगर तालुक्याने द्वितीय, तर अकोले तालुक्याने तृतीय क्रमांक मिळविला. १६ व १७ ऑगस्ट रोजी झालेल्या या स्पर्धेत जिल्हाभरातील युवा योगासनपटूंनी आपल्या कौशल्याने उपस्थितांची मने जिंकली.
योगासनपटूंच्या कौशल्याचा थरार
अहिल्यानगर जिल्हा योगासन स्पोर्ट्स असोसिएशन आणि महाराष्ट्र योगासन स्पोर्ट्स असोसिएशन यांच्या संयुक्त विद्यमाने ही स्पर्धा आयोजित करण्यात आली होती. समता इंटरनॅशनल स्कूलचे संस्थापक ओमप्रकाश दादाप्पा तथा काका कोयटे यांच्या अध्यक्षतेखाली झालेल्या या स्पर्धेमुळे दोन दिवस शाळेच्या परिसरात क्रीडामय वातावरण निर्माण झाले होते.
पारंपरिक योगासनासह आर्टिस्टिक योगासन सिंगल, आर्टिस्टिक योगासन पेअर, रिदमिक योगासन पेअर, ट्रेडिशनल ग्रुप आणि आर्टिस्टिक ग्रुप अशा विविध प्रकारांत खेळाडूंनी सहभाग घेतला. अचूक आसन, शरीराचा समतोल, लवचिकता, तालबद्धता आणि मानसिक एकाग्रतेचे उत्कृष्ट दर्शन प्रत्येक सादरीकरणातून घडले.
योग शरीरासोबत मनही घडवतो : संजय मालपाणी
कार्यक्रमाचे प्रमुख अतिथी मालपाणी उद्योग समूहाचे अध्यक्ष डॉ. संजय मालपाणी यांनी योग ही केवळ शरीर तंदुरुस्तीची साधना नसून मनाला स्थैर्य, विचारांना सकारात्मक दिशा आणि जीवनाला शिस्त देणारी प्रक्रिया असल्याचे सांगितले.
विद्यार्थ्यांनी योगाला आपल्या दैनंदिन जीवनाचा अविभाज्य भाग बनवावा. समता इंटरनॅशनल स्कूलकडून योग व क्रीडा क्षेत्राला दिले जाणारे प्रोत्साहन कौतुकास्पद असून, अशा उपक्रमांमुळे विद्यार्थ्यांच्या सर्वांगीण व्यक्तिमत्त्वाचा विकास होतो, असे त्यांनी नमूद केले.
आरोग्य हीच खरी संपत्ती : खासदार वाकचौरे
शिर्डी मतदारसंघाचे खासदार भाऊसाहेब वाकचौरे यांनी आरोग्य हीच खरी संपत्ती असल्याचे सांगत विद्यार्थ्यांनी शिक्षणासोबत योग आणि क्रीडेलाही जीवनाचा भाग बनवावे, असे आवाहन केले. योगामुळे शिस्त, संयम, एकाग्रता आणि सकारात्मक दृष्टिकोन विकसित होण्यास मदत होते. विद्यार्थ्यांनी अभ्यासाबरोबर क्रीडा क्षेत्रातही सातत्याने सहभाग घ्यावा, असे त्यांनी सांगितले.
विजयापेक्षा प्रयत्न महत्त्वाचे
समता इंटरनॅशनल स्कूलच्या कार्यकारी विश्वस्त सौ. स्वाती कोयटे यांनी योगामुळे शरीर सुदृढ, मन स्थिर आणि व्यक्तिमत्त्व आत्मविश्वासपूर्ण बनत असल्याचे सांगितले. स्पर्धेतील विजयापेक्षा सातत्य, जिद्द आणि प्रामाणिक प्रयत्न अधिक महत्त्वाचे असल्याचे त्यांनी स्पष्ट केले.
विद्यार्थ्यांच्या नृत्याविष्काराने रंगत
योगासन स्पर्धेला सांस्कृतिक कार्यक्रमाचीही रंगत लाभली. आदित्य सूर्यवंशी आणि गार्गी पाटील यांच्या मार्गदर्शनाखाली विद्यार्थ्यांनी सादर केलेल्या बहारदार नृत्याविष्काराला उपस्थितांनी उत्स्फूर्त दाद दिली.
मान्यवरांची उपस्थिती
कार्यक्रमाच्या प्रारंभी समता इंटरनॅशनल स्कूलचे प्राचार्य समीर अत्तार यांनी उपस्थितांचे स्वागत व परिचय करून दिला. पारितोषिक वितरणासाठी शिर्डी नगर परिषदेचे नगरसेवक अमित शेळके, योग प्रशिक्षक उत्तमभाई शहा, अभिजीत शहा, सतीश गुजराथी, महेश थोरात, आदिनाथ ढाकणे, समता पतसंस्थेचे संचालक संदीप कोयटे आणि कार्यकारी विश्वस्त सौ. स्वाती कोयटे उपस्थित होत्या.
स्पर्धेच्या यशस्वी आयोजनासाठी शिक्षिका कविता पाटील, विभावरी नगरकर, शुभम औताडे यांच्यासह समता इंटरनॅशनल स्कूलच्या सर्व क्रीडा शिक्षकांचे सहकार्य लाभले. सूत्रसंचालन श्वेताली सदाफळ यांनी केले, तर उपप्राचार्य मोहिनी जगताप यांनी आभार मानले.
स्पर्धेचा अंतिम निकाल
प्रथम क्रमांक : संगमनेर तालुका
द्वितीय क्रमांक : अहिल्यानगर तालुका
तृतीय क्रमांक : अकोले तालुका
विजेत्या संघांसह स्पर्धेत सहभागी झालेल्या सर्व खेळाडूंचे मान्यवरांनी अभिनंदन केले.
ही बातमी उपयुक्त वाटली असेल तर आपल्या मित्रांपर्यंत नक्की शेअर करा. आपल्या प्रतिक्रिया कमेंटमध्ये जरूर नोंदवा. अशाच ताज्या आणि विश्वासार्ह बातम्यांसाठी ‘वृत्तवेध’ला नियमित भेट द्या.
