कोपरगाव : चालू वर्षी दुष्काळामुळे पाणीटंचाईचे संकट निर्माण होण्याची शक्यता असून पुढील सहा ते आठ महिने शेतकऱ्यांसाठी आव्हानात्मक ठरणार आहेत. अशा परिस्थितीत कमी खर्चात अधिक उत्पादन घेण्यासाठी शेतीला विज्ञान आणि आधुनिक तंत्रज्ञानाची जोड देणे आवश्यक आहे, असे प्रतिपादन आमदार आशुतोष काळे यांनी केले.
माजी खासदार कर्मवीर शंकरराव काळे यांच्या १४व्या पुण्यस्मरणानिमित्त कर्मवीर शंकरराव काळे सहकारी साखर कारखाना आणि कर्मवीर शंकरराव काळे मित्र मंडळाच्या संयुक्त विद्यमाने कोळपेवाडी येथील गौतम पब्लिक स्कूलच्या मैदानावर कर्मवीर कृषी महोत्सव २०२६ आयोजित करण्यात आला आहे. माजी आमदार अशोकराव काळे यांच्या अध्यक्षतेखाली आणि माजी साखर आयुक्त शेखर गायकवाड यांच्या हस्ते महोत्सवाचे उद्घाटन झाले.
‘प्रीसिजन फार्मिंग’चा वापर वाढविण्याचे आवाहन
माजी साखर आयुक्त शेखर गायकवाड यांनी शेतकऱ्यांशी संवाद साधताना शेतीतील बदलत्या तंत्रज्ञानाचे महत्त्व सांगितले. शेती संशोधनाचा वेग वाढण्याची गरज असून उपलब्ध नवतंत्रज्ञानाचा प्रयोग करून शेतीतील कष्ट आणि उत्पादन खर्च कमी करण्याचा प्रयत्न शेतकऱ्यांनी करावा, असे त्यांनी सांगितले.
प्रीसिजन फार्मिंगचा वापर वाढविणे आणि पाण्याचा प्रत्येक थेंब जपून वापरणे आवश्यक आहे, असे गायकवाड यांनी नमूद केले. एआय तंत्रज्ञान, आधुनिक यंत्रसामग्री आणि सूक्ष्म नियोजनामुळे शेती अधिक कार्यक्षम होऊ शकते. कृषी महोत्सवाच्या माध्यमातून शेतकऱ्यांना अशा तंत्रज्ञानाची माहिती मिळणार असल्याचे त्यांनी सांगितले.
‘जमिनीचे बांध नव्हे, नात्यांचे बांध टिकवा’
शेतजमिनीच्या बांधावरून आणि वाटणीवरून होणाऱ्या वादांबाबतही शेखर गायकवाड यांनी शेतकऱ्यांना आवाहन केले. काही फुटांच्या जमिनीवरून वर्षानुवर्षे न्यायालयीन लढाया सुरू राहतात. यात पैसा, वेळ आणि मानसिक स्वास्थ्य खर्ची पडते, तसेच कुटुंबातील संबंधही दुरावतात.
त्यामुळे असे वाद न्यायालयात नेण्यापेक्षा सामंजस्याने सोडविण्याची गरज असल्याचे त्यांनी सांगितले. “जमिनीच्या बांधावरून वाद वाढविण्यापेक्षा माणसांमधील नात्यांचे बांध टिकवणे अधिक महत्त्वाचे आहे,” असे गायकवाड म्हणाले.
कर्मवीर काळेंच्या विचारांना कृषी महोत्सवातून आदरांजली
आमदार आशुतोष काळे यांनी कर्मवीर शंकरराव काळे यांच्या कार्याचा उल्लेख केला. शेतकरी, कष्टकरी आणि ग्रामीण भागाच्या आर्थिक उन्नतीसाठी त्यांनी आयुष्य वेचले. सहकार, शेती, शिक्षण आणि सामाजिक विकासाचा समन्वय साधत ग्रामीण प्रगतीचा पाया मजबूत केला. शेतकऱ्यांना आधुनिक तंत्रज्ञानाची माहिती मिळावी यासाठी त्यांनी कृषी प्रदर्शनांच्या माध्यमातून प्रयत्न केले. त्यामुळे कृषी महोत्सव हा त्यांच्या विचारांना वाहिलेली आदरांजली असल्याचे काळे यांनी सांगितले.
आधुनिक शेती तंत्रज्ञानाचे स्टॉल
कृषी महोत्सवात आधुनिक व इलेक्ट्रिक ट्रॅक्टर, फवारणी ड्रोन, सिंचन यंत्रणा, दूध काढणी यंत्रे, कुट्टी मशीन, मल्चिंग पेपर, सोलर व कृषी पंप, जैविक औषधे, बी-बियाणे, पशुखाद्य आणि गांडूळ खत यांसह विविध कृषी साहित्याचे स्टॉल आहेत.
पशुप्रदर्शनात २.०८ फूट उंचीची ‘राधा’ म्हैस, दररोज ३८ ते ४० लिटर दूध देणारी संकरित गाय, पुंगनूर जातीची गाय तसेच विविध जातींच्या शेळ्या-बोकडांनी लक्ष वेधले आहे.
पहिल्याच दिवशी शेतकऱ्यांनी महोत्सवाला उत्स्फूर्त प्रतिसाद देत विविध स्टॉलवरून माहिती घेतली आणि खरेदी केली. याशिवाय मोफत सर्वरोग निदान शिबिराचे आयोजन करण्यात आले आहे.
वृत्तवेध फार्मुला
ही बातमी उपयुक्त वाटली असेल तर आपल्या मित्रांपर्यंत नक्की शेअर करा. आपल्या प्रतिक्रिया कमेंटमध्ये जरूर नोंदवा. अशाच ताज्या आणि विश्वासार्ह बातम्यांसाठी ‘वृत्तवेध’ला नियमित भेट द्या.
