वृत्तवेध ऑनलाईन | शिर्डी : राजेंद्र सालकर
श्री साईबाबांच्या पुण्यतिथी उत्सवाच्या मुख्य दिवशी शिर्डीतील श्री द्वारकामाई भक्तिरसात न्हाऊन निघाली. साईभक्तांच्या श्रद्धेचे प्रतीक असलेल्या श्री साईसच्चरित या पवित्र ग्रंथाच्या अखंड पारायणाची उत्साहपूर्ण आणि भक्तिमय वातावरणात सांगता झाली. वीणेचा नाद, पोथीचे पूजन आणि साईनामाच्या गजरात पार पडलेल्या सांगता मिरवणुकीने द्वारकामाई परिसरातील वातावरण अधिकच मंगलमय झाले.
श्री साईबाबा संस्थानच्या वतीने सुरू असलेल्या पुण्यतिथी उत्सवात अखंड पारायणाला विशेष महत्त्व आहे. साईबाबांच्या जीवनकार्याचा, शिकवणीचा आणि भक्तांवरील कृपेचा महिमा सांगणाऱ्या श्री साईसच्चरिताच्या पारायणाची सांगता हा उत्सवातील श्रद्धेचा महत्त्वपूर्ण क्षण ठरला. या सोहळ्यात संस्थानचे अध्यक्ष तथा प्रधान जिल्हा न्यायाधीश शिवाजी कचरे यांनी वीणा, मुख्य कार्यकारी अधिकारी गोरक्ष गाडीलकर यांनी पवित्र पोथी, तर उपमुख्य कार्यकारी अधिकारी भीमराज दराडे आणि कार्यकारी अभियंता भिकन दाभाडे यांनी श्री साईबाबांची प्रतिमा हातात घेऊन सहभाग नोंदविला.
यावेळी मंदिर विभागप्रमुख विष्णू थोरात, प्रभारी जनसंपर्क अधिकारी दीपक लोखंडे, मंदिरातील पुजारी, शिर्डी ग्रामस्थ आणि साईभक्त मोठ्या संख्येने उपस्थित होते.
श्रद्धा, भक्ती आणि साईनामाचा जयघोष!
साईबाबांच्या पुण्यतिथी उत्सवाच्या मुख्य दिवशी पारायणाच्या सांगतेने भक्तांना आध्यात्मिक समाधानाचा अनुभव दिला. साईबाबांच्या विचारांचा आणि शिकवणीचा जागर करत पार पडलेल्या या धार्मिक सोहळ्यात संस्थानचे पदाधिकारी, कर्मचारी, ग्रामस्थ आणि भाविक सहभागी झाले. श्रद्धा आणि भक्तिभावाने नटलेल्या या सोहळ्याने शिर्डीतील उत्सवी वातावरणात आणखी भर घातली.
👍 बातमी आवडली? शेअर करा | 💬 प्रतिक्रिया कमेंटमध्ये नोंदवा | 📲 ताज्या अपडेटसाठी ‘वृत्तवेध’सोबत जोडलेले रहा.
