कोपरगाव वृत्तवेध:
माहेगाव देशमुख येथे मध्यरात्री संशयास्पदरीत्या फिरणाऱ्या इसमाला कोपरगाव तालुका पोलिसांनी शिताफीने ताब्यात घेतले. कार्तिक गुलाब निकम (रा. माहेगाव देशमुख) असे त्याचे नाव असून, तपासात तो श्रीरामपूर तालुका पोलिस ठाण्यात दाखल असलेल्या ९ लाख ८० हजार रुपयांच्या दरोड्याच्या गुन्ह्यातील फरार आरोपी असल्याचे निष्पन्न झाले.
माहेगाव देशमुख येथील गणपती मंदिराच्या मागील बाजूस निकम संशयास्पदरीत्या फिरत असल्याची माहिती पोलिसांना मिळाली. पोलिस पथक तेथे पोहोचताच त्याने पोलिसांची चाहूल लागताच पळून जाण्याचा प्रयत्न केला. मात्र, पोलिसांनी पाठलाग करून त्याला ताब्यात घेतले.
निकमविरुद्ध महाराष्ट्र पोलिस अधिनियम १९५१ मधील कलम १२२ अन्वये कारवाई करण्यात आली. त्यानंतर पोलिसांनी त्याची माहिती व पूर्वीचे रेकॉर्ड तपासले असता, तो १ मार्च २०२५ रोजी खानापूर येथे ७९ वर्षीय महिलेच्या घरावर पडलेल्या दरोड्यातील फरार आरोपी असल्याचे समोर आले.
या दरोड्यात आरोपींनी महिलेच्या घरात प्रवेश करून कोयत्याचा धाक दाखवत सोन्याचे दागिने आणि रोख रक्कम असा सुमारे ९ लाख ८० हजार रुपयांचा ऐवज लुटला होता. या गुन्ह्यातील निकमच्या साथीदारांना यापूर्वी अटक करण्यात आली होती. मात्र, निकम पोलिसांना गुंगारा देत फरार होता.
पोलिसांच्या सतर्कतेमुळे फरार आरोपी जाळ्यात
मध्यरात्री संशयास्पद हालचाली करणाऱ्या इसमावर पोलिसांनी ठेवलेली नजर आणि त्यानंतर केलेल्या रेकॉर्ड तपासणीमुळे दरोड्याच्या गंभीर गुन्ह्यातील फरार आरोपी पोलिसांच्या हाती लागला. त्याला पुढील कायदेशीर कारवाईसाठी श्रीरामपूर तालुका पोलिसांच्या ताब्यात देण्यात आले आहे.
ही कारवाई पोलीस अधीक्षक मुम्मका सुदर्शन, अपर पोलीस अधीक्षक सोमनाथ वाघचौरे, उपविभागीय पोलीस अधिकारी अमोल भारती आणि पोलीस निरीक्षक संभाजी गायकवाड यांच्या मार्गदर्शनाखाली करण्यात आली.
कारवाईत पोलीस उपनिरीक्षक कमलाकर चौधरी, पोलीस कॉन्स्टेबल रशिद शेख, प्रकाश नवाळी, सागर शेवाळे, चालक पोलीस कॉन्स्टेबल अनिल फाळके आणि होमगार्ड अमोल तासकर यांनी सहभाग घेतला.
👍 बातमी आवडली? शेअर करा | 💬 प्रतिक्रिया कमेंटमध्ये नोंदवा | 📲 ताज्या अपडेटसाठी ‘वृत्तवेध’सोबत जोडलेले रहा.
